Rerouting ipatuman atol sa pista sa Mandaue

CEBU, Philippines - Dunay ipatumang rerouting sa mga dalan sa dakbayan sa Mandaue alang sa umaabot nga kapistahan sa ilang patron nga Senyor San Jose karong Mayo 8 niining tuiga.

Nunot usab kini sa gipadala nga traffic advisory sa Banat News gikan sa Traffic Enforcement Agency of Mandaue (TEAM) nga nagpahibalo labot sa mga dalan nga kaagian ug dili kaagian sa PUJ sa adlaw sa kapistahan.

Ang rerouting gituyo aron di mahasol kadtong mga sakyanan gikan sa dakbayan sa Sugbo, dakbayan sa Lapu-Lapu ug amihanang bahin sa lalawigan atol sa maong adlaw. Kadtong mga jeepneys nga mobiyahe gikan sa amihanang bahin sa lalawigan pasulod sa Barangay Centro, Mandaue City subay unta sa dalan sa M.C. Briones,  adto kini moliko sa wala sa A.C. Cortes Avenue ug moliko sa tuo  sa eskina sa dalan S.B. Cabahug lahos na ngadto sa Barangay Centro.

Ang mga PUJ gikan sa Cebu City nga mopadulong sa  Barangay Centro  adto mosubay sa dalan A. del Rosario, moliko sa tuo sa dalan B. Ceniza  ug moliko sa dalan A. Soriano ug lahos sa pagadulngan niini.

Ang mga PUJ nga gikan sa Barangay Looc nga mopadulong sa dakbayan sa Sugbo adto kini mosubay sa Catalino Ouano Avenue,  moliko sa wala nga bahin sa eskina dalan Plaridel ug  moliko  padulong sa tuong bahin sa dalan A. Soriano Avenue ug molahos na paingon sa dakbayan sa Sugbo.

Ang mga PUJ gikan sa New Public Market sa Sitio Tribunal, Barangay Centro nga mopadulong sa amihanan sa Sugbo mosubay sa dalan P. Burgos,  moliko sa wala sa eskina A. C. Cortes Avenue ug moliko sa tuo sa eskina S.B. Cabahug ug molahos sa pagadulngan sa amihanang bahin sa lalawigan sa Sugbo. (BANAT NEWS)