CEBU, Philippines - Tungod sa pagsaka sa street crimes sa dakbayan sa Sugbo, lima ka mga station commanders ang gikatakdang ilisan.
Giangkon sa hepe sa Investigation and Detection Management Branch (IDMB), Senior Insp Aileen Recla, nga adunay 38 porsiyento ang pagsaka sa street crimes sa dakbayan sa unang quarter niining tuiga itandi sa katapusang quarter sa tuig 2013.
Base sa ilang statistics, 771 ka mga street crimes ang natala sa bulan sa Enero hangtud Abril 2014.
Ang Station 2 ang nag-una sa mga presinto nga adunay daghang street crimes nga natala.
Kini naglakip sa pagpanguot nga maoy labing daghang kaso gisundan sa lungkab ug tulis. Giangkon ni Recla nga naalarma na sila sa pagsaka sa mga street crimes dinhi sa dakbayan.
Usa sa nakita nga hinungdan mao nga may kaisog na ang mga biktima nga moreport sa ilang buhatan sa mga nahitabong krimin.
Apan giangkon usab ni Recla nga adunay mga station commanders nga kulang pa ang pag-monitor niini sa ilang mga sakop ug kulang usab ang ilang pakig-alayon sa publiko.
Ang pagpakig-alayon sa kapolisan ngadto sa mga opisyal sa barangay sa ilang area of concern usa sa giisip nga labing maayong solusyon aron mas mapalig-on pa ang ilang trabaho. (/GMR)(BANAT NEWS)