CEBU, Philippines - Upat ka mga tawo ang patay sa tulo ka managlahing mga kaso sa pagpamusil sud sa dose ka oras sa lalawigan sa Sugbo.
Sa dakbayan sa Toledo, duha ang patay lakip niini ang usa ka foreman sa nahitabong pagpamusil sa barangay Bato, dakbayan sa Toledo sa nakalabay’ng adlaw.
Giila ang mga biktima mao sila si Julius Benitez 39, usa ka foreman, residente sa Barangay Lutopan ug usa ka Simbrod Sombremonte, 40, taga sityo Cabulihan, Barangay Ilihan pulos nagtrabaho sa Balance Engineering Company usa ka sub-contractor sa CBF Power Plant.
Ang duha sakay sa usa ka motorsiklo paingon sa menteryo sa barangay Bato dihang pag-abot sa nahitaboan kalit silang gipamusil gamit ang 9mm pistol.
Si Benitez ug Sobremonte nakaangkon og samad pinusilan sa ulo ug buko-buko nga maoy hinungdan sa ilang hinanaling kamatayon. Dali usab nga misibat ang mga wala ilhing mga kriminal sakay sa itom nga motorsiklo.
Samtang patay usab ang usa ka Romeo Salada Luba, 32, trisikad driver human kini gibanhigan sa tulo ka mga tawo sa Sitio Catura, Barangay Poblacion lungsod sa Cordova sa milabay’ng gabii.
Sa pasiunang imbestigasyon ni PO3 Rodello Librado milabay sa hilit nga dapit ang biktima dihang kalit mitunga ang tulo ka tawo ug gipaulanan kini og bala ug namatay. Pito ka mga bala sa kalibre .45 ang nakuha diha sa crime scene.
Patay usab si Joselito Condiman, 20, residente sa Barangay Canduling, Ronda human gipusil ug naigo sa ilok ug ulo sa usa ka Tito Tabada alyas Tets, 33, taga Labangon, Cebu City.
Samtang usa ka Charlie Caneban, 34, nga giingong kanhi napriso na kaniadto tungod sa kasong pagpangawat ang gipusil patay sa managsuong iyaha nga kontra diha sa Belgium Street, Barangay Suba, ning dakbayan sa Sugbo.
Giila ang biktima nga si Charlie Caneban, 34, nagpuyo sab sa maong lugar. Gipangita ang managsuong suspek nga sila si Harris Echevarre ug Jetro Echevarre, pulos residente sa Barangay Sawang.
Sumala pa nga nagkalalis pa ang biktima ug ang mga suspek dihang kalit kining gipusil. (Raymond Abarcas, Bong Soriano ug Ria Mae Booc/EIM)(BANAT NEWS)