CEBU, Philippines - Tungod sa kadaghan sa samad dinunggaban, patay ang usa ka truck driver human kini tabangi og dunggab sa amahan ug anak.
Giila ang biktima nga si Cerenio Torrevillas, 54, minyo, delivery truck driver nga nagpuyo sa Sitio Lupa, Basak-San Nicolas, dakbayan sa Sugbo.
Base sa imbestigasyon sa kapolisan, alas 11:30 sa gabii nag-inom ang biktima kauban ang iyang mga silingan sa maong lugar. Giila ang suspek nga amahan ug anak nga sila si Joemar Quijano ug Eddie Quijano nga silingan ra sab sa biktima.
Sumala pa sa asoy ni Jenifer Epogon, saksi sa hitabo, nga samtang sila nagtagay kauban ang ilang silingan, kalit lang milabay ang suspek nga si Joemar Quijano ug miingon, “kamong upat ha, mobalik ko ninyo, ngita mo’g gubot?â€
Pipila ka minutos, mibalik si Quijano nga nagdala na og kutsilyo dayon dunggab sa biktima hangtod nga kini natumba.
Misulay pa unta og ulang ang mga silingan niini apan sila apil nga gisulayan pa sa pagdunggab.
Wala magdugay niabot usab ang amahan sa suspek nga si Eddie nga nagdala og pinuti ug apil nga midunggab sa biktima sa makadaghan nga higayon.
Gidala ang biktima sa Vicente Sotto Memorial Medical Center apan gideklarar nga patay na gumikan sa daghang samad dinunggaban nga naangkon niini samtang ang mga suspetsado ang daling misibat sa lugar. (BANAT NEWS)