Tulo ka tawo sikop sa drug bust

CEBU, Philippines - Nadakpan  ang duha ka tawo nga giilang level 2 drug pushers sa buy bust operation nga gihimo sa kapolisan sa Barangay Paknaan, dakbayan sa Mandaue alas-10 pasado ang takna sa miaging gabii. Ang nadakpan mao sila si Mario Yamomo Tanto, 28, ug Reynaldo Padilla Palma, pulos walay trabaho ug nagpuyo sa maong dapit.

Si Senior Inspector Hugo Rio Uy Ipong sa City Anti Illegal Drugs Special Operation Task Force ug Criminal Investigation Bureau (CAIDSOFT-CIB) sa Mandaue City  Police Office (MCPO) maoy nagpasiugda sa buy bust operation.

Matud pa ni Ipong ilang target sa  buy bust operation si Tanto.  Dihang positibo ang impormasyon  gilusad dayon ang buybust operation nga miresulta sa pagkasikop ni Tanto ug Palma. Sa pagrekisa sa duha nakuha gikan nila ang  laing onse pa ka gagmay nga pakete . Ang  duha ka dinakpan nga nabalhog na karon sulod sa ilang detention ilang pasakaan og kaso nga kalapasan sa Section 5 sa Article II sa Republic Act 9165 o Comprehensive Dangerous Drug Act of 2002.

Samtang nadakpan sa kapolisan sa dakbayan sa Toledo ang usa ka 61 anyos nga gituohang drug pusher  nga giilang si Roque Bayuhin nga taga Sitio Baybay Uno San Juan, barangay Poblacion.

Matud ni Police Chief Inspector Michael Anthony Bastes , hepe sa Toledo City Police Station nga  nakuha gikan sa suspek ang lima ka gagmayng pakete nga gituohang shabu  nga mobalor og tag P200 ang matag pakete. Sila si Police Inspector  Jovito Labra ug PO3 Romeo Jaranilla ang misikop sa maong suspek ug gikatakdang pasakaan og kasong kalapasan sa paghupot og ginadiling drugas. (BANAT NEWS)