CEBU, Philippines - Girelibohan na sab ang lain pang sakop sa Highway Patrol Group 7 nga nalambigit sa ambush kang Atty. Noel Archival ug mga kaubanan didto sa Dalaguete.
Si PO1 Alex Bacani mao ang uwahing girelibohan ug gipalabay ngadto sa Manila sugod niadtong Abril 23 ning tuiga. Matud pa sa tigpamaba sa HPG-7 nga si Senior Inspector Oliver Plania nga si Bacani na ang ikalima nga sakop sa ilang buhatan ang na-relieved sa katungdanan ug diin temporaryo idestino sa Personnel Holding and Administrative Section (PHAS) sa Campo Crame.
Miangkon si Plania nagkulang na og mga personahe ang HPG-7 tungod sa pagrelibo sa ilang mga kaubanan ngadto sa PHAS mao nga naglisod sila karon sa ilang mga naandang trabaho. Niadtong Abril 16, 2014 una nang gilabay ngadto sa PHAS sila si Supt. Romualdo Iglesia ang hepe sa HPG-7, Senior Inspectors Eduardo Mara, HPG Provincial Chief, Joselito Lerion, Special Operation Team ug ang chief clerk SPO4 Edwin Galan.
Si Superintendent Rommel Ochave mao na ang kasamtangan nga officer-in charge sa HPG-7 subay sa kamandoan ni Sr. Supt. Edwin Rey Butacan.
Niadtong Pebrero 18, 2014 gi-ambush si Atty. Noel Archival uban sa tulo ka mga kauban niini sa Barangay Coro, Dalaguete Cebu, diin si Paulo Cortez lang ang naka-survive. (BANAT NEWS)