CEBU, Philippines - Nawad-an og pinuy-anan ang kapin sa 100 ka pamilya sa kalit nga pag-ulbo sa kalayo sa sunog nga nahitabo alas 9:09 ang takna sa miaging Lunes sa gabii sa Purok II, Sitio Marpa, Barangay Bakilid, dakbayan sa Mandaue.
Si SFO3 Roy Garcia, chief investigator sa Bureau of Fire Protection (BFP) sa dakbayan sa Mandaue miingon nga ilang nakontrol ang kalayo alas 9:42 na ang takna sa gabii ug hingpit kini nilang napawong alas-3 na pasado ang takna sa kaadlawon.
Gitug-an ni Garcia nga nagsugod ang kalayo sa ground floor sa panimalay ni Rodrigo Barangan nga usa ka barangay tanod, kini ginama sa light materials ug mitapon kini sa mga kasikbit nga panimalay sa maong lugar.
Dugang pa ni Garcia nga pulos ginama sa light materials ang mga panimalay sa lugar maong dali kining mikatap. Mokabat sa P1 milyon ang kantidad sa danyos nga naglakip na sa pipila ka motorsiklo.Padayon pa ang imbestigasyon sa maong sunog.
Gisusi pa ang report nga charger nga “Made in China†ang hinungdan sa maong sunog. Si Chief Inspector Joel Abarquez nga maoy city fire marshall dali nga mipaubos sa Task Force Alpha (TFA) nga maoy hinungdan sa pagtubag sa kabomberohan sa dakbayan sa Sugbo, Consolacion ug dakbayan sa Lapu-Lapu. Mitabang usab ang Chinese Filipino Volunteer Fire Brigade, Emergency Rescue Unit Foundation (ERUF) Barangay Tipolo Volunteer Fire Brigade ug uban pa. Si Garcia miingon nga sudlonon kaayo ang lugar mao nga gisumpaysumpay nila ang ilang mga hose aron makaabot didto.
Si barangay kapitan Dionesio Iyoy Villamor mipatawag dayon kagahapon sa buntag og special session ug gideklarar nga under state of calamity ang maong dapit. Si Violita Cavada, social welfare officer sa Social Welfare and Development Office (CSWDO) sa dakbayan miingon nga nanghatag na sila og ready to eat meals nga molungtad og tulo ka adlaw.
Matud pa nga mokabat sa 103 ka pamilya nga nagpuyo sa 46 ka balay nga naugdaw ang naapektahan. Gihatagan usab nila ang mga biktima og pasiunang hinabang nga naglakip sa mga habol, banig, unlan, balde, mga kahimanan sa pagluto ug uban pa. (BANAT NEWS)