CEBU, Philippines - Gitataw sa kadagkoan sa Department of the Interior and Local Government (DILG) nga ang mga opisyal sa barangay makahimo sa pagkuha og dugang tanod subra sa 20 nga maoy gilatid sa Local Government Code.
Ang mao nga katin-awan giluwatan ni DILG Cebu City Director Danilo Almendras human nga ang kapitan sa Barangay Labangon nga si Victor Buendia mihangyo sa mga opisyal sa City Hall nga tugotan sila nga maka-hire og dugang 20 ka tanod.
Ang Section 393 (d) sa Local Government Code, naglatid nga 20 lang ka tanod ang mamahimo nga kuhaon sa barangay ug gahinan og budget alang sa ilang honorarium.
Matud ni Kapitan Buendia nga daku kaayo ang Barangay Labangon mao nga magkinahanglan siya og subra sa 20 ka tanod aron kaprotehean nila ang mga molupyo sa ilang barangay.
Si Almendras nagkanayon nga atol sa termino ni kanhi DILG Secretary Jose Lina adunay giisyu nga memorandum circular nga nagtugot nga ang usa ka barangay makahimo pagdugang og tanod.
Dinhi sa dakbayan ang ubang opisyal sa barangay nag-inantigo pinaagi sa pagkuha og tanod unya ila nga ipasulod isip gwardya sa lainlaing balay-patigayon.
Tumong niini nga daghang tanod ang makita sa lainlaing dapit ug ang mao nga mga extra tanod makakwarta usab sa ilang pagka guwardya. (BANAT NEWS)