Bag-Ong toledo coliseum tukuron

CEBU, Philippines - Plano ni Toledo City Mayor John Henry "Sonny" Osmeña nga magpatukod og coliseum. Gibutyag kini sa mayor sa iyang pakigpulong atol sa gipahigayong awarding ceremony sa 1st Gatorade Beach Volleyball Challenge sa Barangay Ibo, Toledo City diin ang mao nga sports event gipaluyohan usab sa tourism council.

Matud ni Osmeña nga makigtagbo siya sa mga board of directors sa  Carmen Copper  Corporation ug Atlas Consolidated Mining and Development Corporation aron awhagon ang maong mga kompanya pag-abag sa katukuran sa bag-o’ng coliseum.

Tinguha sa  mayor nga usa ka non-profit, non-stock ug private partnership ang pagtukod sa maong coliseum. Tumong ni Osmeña nga mapalambo ang nagkadaiyang natad sa paugnat sa kusog sa dakbayan. (BANAT NEWS)