Kawat ug lungkab miigo sa siyudad

CEBU, Philippines - Tulo ka sunod-sunod nga insidente sa pagpangawat ang nahitabo kaniadtong Domingo ning dakbayan sa Sugbo.

Usa niini nahitabo duol sa Trans Asia ticketing office sa pier area diin usa ka Leo Marcelino Aliño, 39, taga Barangay. Sambag 1 ning dakbayan ang nabiktima.

Mopalit unta og tiket sa barko ang biktima dihang gilabni  ang bag ni Aliño nga dunay sulod nga 21K nga kwintas (P60,000) , class ring (P80,000), wedding ring (P15,000), kwarta nga nagkantidad og P123,000 ug mga papeles.

Gimando dayon ni Chief Insp. Wildemar Tiu, hepe sa Waterfront Police Station ang pag-imbestigar sa maong kaso.

Sa laing bahin, sa alas-2 sa hapon, adunay pagpanglungkab nga nahitabo sud sa Udesis Bar and Restaurant, diha sa Don Bosco , Barangay Apas, Cebu City nga gidumala sa usa ka  Immanuel Udeh, 27, nga usa ka Filipino-American.

Ang biktima nagkanayon sa kapolisan nahanaw ang iyang videoke player nga nagkantidad og P61,000 ; LPG tank P1,000, ug upat ka mono block chairs.

Ang mga kawatan miguba sa lock sa sliding door ug diha miagi pagsulod sa maong tindahan. Ang kapolisan nanguha na og mga fingerprints aron sa pag-ila sa mga kawatan.

Samtang gilungkab usab ang Montesclaros Pension House, sa dalan Pelaez, Barangay San Antonio ning dakbayan.

Ang maong establisamento girepresentahan ni Mary Jane Yonco, 35,  mitug-an nga gilungkab sa kawatan ang door knob sa pultahan ug dihang nakasulod gikawat niini ang laptop ug 21-inch flat screen TV. (BANAT NEWS)