CEBU, Philippines - Usa ka lalaki nga adunay samad pinusilan ang napalgan kagahapon sa kaadlawon diha sa Barangay Tejero ning dakbayan sa Sugbo.
Ang lawas ni Bobby Estaño Ectuban, lumulupyo sa 1109 P. MJ Cuenco Avenue, Barangay Carreta, Cebu City napalgan sa Villagonzalo 2, Barangay Tejero.
Ang biktima nakaangkon og samad pinusilan sa atubangan nga nilapos sa iyang likod nga gituohang maoy hinungdan sa dali niyang kamatayon.
Sa pasiunang imbestigasyon sa Cebu City Police Office Homicide Section ug kapulisan sa Waterfront Police Station nasuta nga dunay kauban ang biktima nga usa ka wa mailhing tawo nga nagdala og motorsiklo sa wala pa ang insidente.
Nakuha gikan sa biktima ang usa ka brown wallet nga may sulod nga usa ka 20-peso bill ug nagkalain-laing papeles ug COMELEC (Commission on Elections) nga identification card.
Gisubay pa karon kung unsay motibo ug kung kinsa ang mamumuno sa biktima. (BANAT NEWS)