Kalihokan sa pista sa Mandaue

CEBU, Philippines - Gisugdan na sa mga opisyal sa Mandaue ang matag gabii nga kalihokan nga kabahin sa pagsaulog sa tinuig nga pangilin ni Senyor San Jose nga pagahimoon karong Mayo 8.

Ang kalihukan gisugdan sa motorkada subay sa kadalanan sa Mandaue nga gisalmotan sa mga opisyal sa 27 ka barangay, pipila ka mga opisyal ug kawani sa dakbayan. Ang katawhan mihugyaw pag-agi na sa 12 ka maanyag nga kandidata sa Miss Mandaue 2014 nga mikuyog sa motorkada sukad sa pagsugod ug hangtod na sa pagtapos. 

Nagsugod ang motorkada atubangan sa Mandaue City Hall ala 1 ang takna sa hapon ug gitapos usab kini pagbalik sa City Hall ground lapas sa alas 5 sa hapon ug gideklarar dayon ni Acting Mayor Glenn Bercede ang pagbukas sa mga kalihokan sa pista karong tuiga.

Si Bercede maoy nangulo sa motorkada hulip ni Mayor Jonas Cortes nga milarga sa Amerika sa miaging Semana Santa ug karon pa’ng Miyerkules gikatakdang  mahibalik.

Matud ni Bercede nga nagkalainlain kalihokan ug kalingawan ang gihan-ay na sa matag gabii nga pasiugdahan sa kagamhanan. Lakip niini ang tugtog sa nagkadaiyang mga banda anha sa plaza sa dakbayan.

Gitug-an ni Bercede nga lakip sa gihan-ay nga dagko’ng kalihokan alang sa tinuig nga pangilin ni Senyor San Jose, patron sa dakbayan, mao ang pagkorona sa Queen and Princes, Miss Gay ug Miss Mandaue 2014.

Himoon kini sa tulo ka hugna. Ang koronasyon sa Queen and Princess sa gabii sa Mayo 5, Miss Mandaue sa Mayo 7 sa gabii ug Miss Gay sa Mayo 9 sa gabii. (BANAT NEWS)