CEBU, Philippines - Mga batan-ong lider sa nagkalain-laing dioceses sa Central ug Eastern Visayas nagtigom sa Sugbo ug motapos sa ilang panagtigom pinaagi sa paghatag og pagyukbo sa duha ka Santo Papa nga ideklarar nga mga santos karong adlawa.
Si Marlito Cabigas, Youth Coordinator sa Artsidiyosesis sa Sugbo nga nahinabi sa Banat News miingon nga ang maong panagtigom gitumong sa pag-report sa mga leaders sa lain-laing diyosesis sa kalihokan sa mga batan-on.
Apan sa dili pa matapos ang maong kalihokan maghimo og pilgrimage ang mga batan-ong lider sa duha ka mga sites nga diin didto nahimutang ang mga imahen sa duha ka mga umaabot nga santos. Sa alas 9:00 sa buntag unang adtoon sa mga batan-on ang Blessed John XXIII Seminary sa Mabolo ug mohatag sila og pipila ka pag-ampo ug mohalad og bulak sa monumento niini sulod sa seminaryo.
Ang maong seminaryo gipangalan kang Blessed John XXIII nga kampeyon sa mga tradisyonal nga mga katoliko. Sunod nga adtoon sa mga batan-on mao ang Cebu Metropolitan Cathedral dayon ngadto sa Basilica Menore del Sto Niño ug ang Magellan’s Cross. Human niini mopadulong sila sa Fort San Pedro ug sa templete ni San Pedro Calungsod sa South Road Properties.
Mopadulong na usab sila sa Chapel ni San Pedro Calungsod ug molahos sa Archdiocesan Shrine of Saint Pedro Calungsod sa Archbishop’s Palace ug modiretso sa hawanan sa palasyo sa Arsobispo diin didto buhaton ang pagyukbo kang Blessed John Paul II.
Matud pa ni Cabigas nga dako og natabang si Pope John Paul II sa mga batan-on ug angay lang nga pasalamatan siya ug yukboan.
Dugang ni Cabigas nga si Pope John Paul II ang nagmugna sa World Youth Day nga gisunod sab sa Sugbo pinaagi sa paghimo og Local World Youth Day ug sa uban pang kanasuran.
Nahinumdum si Cabigas sa gipamulong ni Pope John Paul ngadto sa mga batan-on nga “Do not be afraid.â€
Dugang ni Cabigas nga hinaot nga himuong ehemplo sa mga batan-on ang gihimo sa Santo Papa nga walay kukahadlok sa pagpuyo sa iyang pagtuo taliwala sa paggukod kaniya sa kanhi komunistang Poland. (BANAT NEWS)