CEBU, Philippines - Batan-on nga wa damha nga nakaapil sa World Youth Day niadtong 1995 nga nakaduol ni Pope John Paul II gihinumduman ang mga pulong nga giluwatan niini ngadto kaniya.
Si Fatima Piodos ang assistant coordinator sa Cebu Diocesan Youth Coordinating Council nga nahinabi sa Banat News miingon nga nakakita ug nakaduol gyud siya ni Pope John Paul II atol sa iyang pagbisita dinhi sa nasud.
Si Piodos miingon nga niadtong 1995 wa siya magdahom nga makaapil sa maong kalihokan sanglit wala man siya ma-register nga moapil sa WYD.
Apan tungod kay nagkulang man ang delegado sa Australia gipuno siya sa grupo.
Nahinumdum pa si Piodos nga wala gyud siyay andam niadtong panahona ug sakay sila sa usa ka abyon sa militar gikan sa Benito Ebuen Airbase ug gihatod sila niini ngadto sa kaulohan.
Sumala pa ni Piodos nga dako niyang kahingangha nga siya usa sa napili nga mohalad sa misa nga gihalad sa Santo Papa.
Dihang iya nang gihatag sa Santo Papa ang iyang halad militok og pipila ka pulong si Blessed John Paul II kaniya ug miingon nga “offer your smile to the young people.â€
Mga pulong nga dili gyud niya makalimtan sukad niadtong higayona hangtod karon nga matud pa niya iyang gibalon sa iyang pagpangalagad sa mga batan-on. (BANAT NEWS)