CEBU, Philippines - Dako ang pagtuo ni Barangay Kapitan Nelson Rubio sa Barangay Umapad, Dakbayan sa Mandaue nga masulbad na ang ilang problema sa baha karong kompletuhon na ang P41 milyones nga drainage project sa ilang dapit.
Kini manukad sa ubos nga bahin sa Marcelo Fernan Bridge lahos ngadto sa dalan Batiller padung na sa Mactan Channel.
Matud pa ni Rubio nga gisugdan sa pagpatuman sa Oktobre sa miaging tuig ang phase I sa maong proyekto nga nagkantidad og P21 milyones ug nahingpit nga nahuman niadtong bulan sa Disyembre.
Ang phase 2 gikatakda nga sugdan sa pagtrabaho sa sunod semana mao ang nagkantidad og P20 milyones alang sa hingpit na gayod nga paghuman niini.
Si Rubio mipasabot nga sa nangaging katuigan maoy ilang nasinati ang mga pagbaha sa maong lugar tungod sa mabaw ug gagmay ang ilang kanal nga dali ra usab mabara sa basura hinungdan nga molapaw ang tubig ilabi na kun kusog ang uwan. (BANAT NEWS)