Mga adik nga kawani sa barangay

CEBU, Philippines - Walo na usab ka kawani sa barangay ang napositibo sa kinalit nga drug test nga gipahigayon sa mga sakop sa Cebu City Office for Substance-Abuse Prevention (COSAP) kagahapon.

Ang gihimoan og kinalit nga drug test sa mga sakop sa COSAP kagahapon mao ang mga kawani sa Barangay Sambag 2 ug Barangay Zapatera, dakbayan sa Sugbo. Si COSAP chief Alice Utlang miingon nga gihangyo sila ni Sambag 2 Barangay Kapitan Carl Stephen Belarmino nga himoan og drug test ang iyang 85 ka kawani aron mahibaw-an kinsa kanila ang adik.

Ang mga opisyal sa Barangay Zapatera miawhag usab nga i-drug test ang ilang mga kawani ug apil sila nga mga opisyal. Lima ang napositibo sa Sambag 2 ug tulo sa Zapatera.

Matud ni Kapitan Belarmino nga ang lima ka kawani sa Sambag 2 nga napositibo sa drug test naglakip sa usa ka tanod, usa ka Barangay Environmental Officer, kawani sa Clean and Green ug ang duha mga volunteer paramedics ug barangay fire fighter. Si Dr. Utlang miingon nga ang napositibo sa Barangay Zapatera usa ka tanod ug duha ka loaders sa garbage truck.

Matud ni Kapitan Belarmino nga kun siya ang pagbut-on gusto niya nga taktakon dayon ang mao nga mga kawani sa Sambag 2 nga napositibo sa illegal nga drugas.

Hinoon, matud sa kapitan nga maminaw siya sa sentimento sa mga sakop sa konseho sa barangay. Gusto ni Dr. Utlang nga ang mga opisyal sa barangay mopahimulos dayon karong buwan sa Mayo sa pagpa-drug test sa ilang mga kawani kay sa Hunyo aduna sila’y laing programa sa COSAP. – (BANAT NEWS)