Mayor sa Argao hayan mataktak sa katungdanan

CEBU, Philippines - Nag-atubang karon og kaso’ng Abuse of Authority ug kalapasan sa Presidential Decree 705 kon Forestry Code of the Philippines si Argao Mayor Edsel Galeos ug laing lima ka tawo.

Ang kaso naglambigit sa pag-develop nila sa timberland area nga gipanag-iya sa Department of Environment and Natural Resources (DENR) -7 nga nakaapekto sa dul-an 400 ka nagkalain-laing kahoy nga adunay gidaghanon mokantidad og P100 mil.

Matud ni Eddie Llamedo sa DENR-7 nga ang pagpamutol sa kahoy gihimo didto sa Sitio Binalabag, Barangay Jampang, Argao.

Kaso nga Abuse of Authority ang gipasaka batok ni Mayor Galeos human masuta gikan sa lima ka trabahador nga ang mayor maoy nagsugo kanila pagputol sa mga kahoy.

Ang  mga trabahador nga gi-interview sa DENR mao sila si Alex Birondo, Elbert Saniel, Arturo Bonachita, Jovani Espina ug Alan Reyes.

Nasuta nga way permit ug pagtugot gikan sa ilang buhatan ang maong development site.

Base sa Presidential Decree 705, Section 78, nga ang mahimong silot niini kun kapamatud-ang sad-an ang sinumbong mao ang dismissal ug disqualification sa paghupot og bisan unsang katungdanan sa kagamhanan.

Sa interview ni Mayor Galeos iyang gibutyag nga wala pa niya madawat ang kopya sa kaso nga gipasaka sa DENR. Iya nga gipasabot nga ang mao nga dapit nga ilang gihawanan gihimo nila nga Eco-Tourism park  ug gidonar na kini sa lungsod.

Matud sa mga opisyal sa DENR nga ang pagpasaka nila og kaso ni Mayor Galeos magsilbi unta nga pasidaan sa ubang mga mayor nga dili sila magpataka paghatag og pagtugot pagpamutol og kahoy kay ang DENR lang ang adunay katungod paghatag og permit sa pagputol og kahoy. (BANAT NEWS)