CEBU, Philippines - Gipresentar atubangan sa mga sakop sa media ang gipasanginlang drug lord ug nagpadagan og gun for hires sa Villagonzalo II, Barangay Tejero ning dakbayan sa Sugbo kagahapon.
Ang suspek giilang si Harold Dequitos, alyas Along, 27, kinsa nagtago-tago sa balaod tungod sa nagpatong-patong niyang kaso sa illegal drugs ug sa pagpamusil.
Apil sa nasikop ang laing tulo pa niya ka mga kauban nga sila si Joseph Morata Baring, 23, Jose Mari Tiu Mogut, 27, ug ang usa ka minor de edad.
Sumala pa ni Chief Inspector Romeo Santander, hepe sa City Intelligence Branch sa Cebu City Police Office, ang pagkasikop kang Dequitos nakasulbad usab sa daghanang mga kaso niini dinhi sa dakbayan sa nanglabay pang katuigan.
Nadakpan sila sa Sitio Crossing Bunakan, Barangay Pili, Madridejos, Bantayan Island. Si Dequitos nadakpan pinasikad sa warrant of arrest nga gi-isyu ni Hon. Judge Enriquita Belarmino sa RTC Branch 57 nga walay girekomendar nga piyansa alang sa iyang temporaryong kaga-wasan. Samtang mag-atubang usab og kalapasan sa paghupot og illegal nga armas ingon man drugas ang tulo niya ka mga kauban human sila makuhai og mga armas ug shabu atol sa ilang pagkadakop.
Sumala pa sa impormasyon nga nakuha sa Banat News, natultolan ang grupo tungod sa pag-post sa usa sa mga suspek sa iyang Facebook account sa ilang gikahimutangan.
Hinoon giangkon ni Dequitos ang tanan nga pasangil batok kaniya.
“ Kadtong mga gipatay, igo ra man mi nga mibalos ato kay mga kontra namo,†matud pa niya. (BANAT NEWS)