CEBU, Philippines - Naguba ang ambulansiya nga nagkarga og manganakay nga babaye dihang kalit niining gikasungag ang usa ka Isuzu Altera nga sports utility vehicle sa eskina Plaridel ug A.C. Cortes Avenue sa barangay Alang-Alang, dakbayan sa Mandaue alas-8 pasado ang takna kagahapon sa buntag.
Si PO2 Rosendo Tarlla, imbestigador sa traffic division sa Mandaue City Police Office (MCPO) miingon nga gimaneho ni Noel Omega, 47, ang ambulansiya nga gipanag-iya sa Lapu-Lapu City Hospital ug ang Isuzu Altera nga sakyanan gimaneho usab ni Marlon Dumandan, 22, taga dalan M.L. Quezon, barangay Pajo, dakbayan sa Lapu-Lapu.
Matud pa ni PO2 Tarlla paingon sa dakbayan sa Sugbo ang ambulansiya nga nagkarga og manganakay nga pasyente nga ihatod sa Vicente Sotto Memorial Medical Center apan nasugamak kini sa aksidente.
Naguba ang atubangang bahin sa ambulansiya ug di pa makadagan maong gibalhin ang karga niini og laing ambulansiya gikan sa Mandaue City Hospital ug maoy naghatod niini sa tambalanan sa dakbayan sa Sugbo. (BANAT NEWS)