CEBU, Philippines - Di angay mabalaka ang publiko sa taho nga dunay mga 14 ka mga tawo nga nia sa rehiyon nga luwan sa Etihad Airways flight EY0424 nga niabot sa Abril 15 nga gikan sa United Arab Emirates.
Mipakanaog na’g kamandoan ang Kampo Crame sa Police Regional Office 7 nga tabangan ang Department of Health 7 sa pagpangita sa 14 ka mga pasahero.
Usa ka Filipino nurse nga luwan sa maong flight ang nagpositibo sa Middle East Respiratory Syndrome Corona Virus sa test didto sa UAE apan migawas nga negatibo kini sa maong sakit sa gihimong test sa DOH atol sa pag-quarantine kaniya.
Giklaro sa PRO7 nga dili dakpon ang maong mga OFW sanglit igo ra sila nga motabang sa pagpangita niini. Duna nay mga pangalan ug address ang kapolisan sa maong mga pasahero apan nagdumili si Supt. Renato Dugan sa pagbutang niini.
Samtang ang DOH miklaro nga duha na lamang ka mga Sugbuanong pasahero ang ilang gipangita sanglit nakit-an na ang uban kanila ug gipaubos na sa medical examinations sa Vicente Sotto Memorial Medical Center.
Si DOH-7 Regional Director Jimmy Bernadas nagkanayon nga nagpatabang sila sa kapolisan pagpangita kanila aron masigurong wa silay nadalang sakit gikan sa maong nasud.
Sa nahisgutang 15 ka nga pasahero, 12 niini ang taga Sugbo, duha ang taga Bohol ug usa ang taga Negros.
Dugang pa ni Bernadas nga ipagawas unya nila ang medical results human sa mga medical examinations. (BANAT NEWS)