CEBU, Philippines - Usa ang patay ug tulo ang angol sa sunog nga miugdaw sa 30 ka mga balay pasado alas 10:00 kagabii sa sitio Riverside, Purok 3, barangay Kamputhaw sa dakbayan sa Sugbo sa miaging gabii.
Ang namatay naila nga si Raymond Belda Jr., 89, usa ka US citizen, ug pensiyonado ug gikataho nga maglisod na sa paglakaw.
Samtang ang naangol naila nga sila si Jerico Go, 20, nga nasamad sa iyang tuo nga tiil; Charlie Santillas, nga nasamad sa iyang tuo nga kamot ug si Benjan Still Uy, 25, nga naangol sa iyang tuong tiil.
Si SFO2 Daniel Relatado Jr., fire investigator nga nahinabi sa mga tigbalita miingon nga nadawat nila ang alarma sa alas 10:09 sa gabii ug matud pa nga nagsugod kini sa balay sa namatay.
Naabot og Task Force Alpha ang maong sunog sa alas 10:28 ug nakontrolar kini sa alas 11:04 sa gabii.
Matud ni Relatado nga na-trap sulod sa balay si Belda tungod kay naglisod man kini og lakaw tungod sab sa iyang pangidaron.
Si SPO4 Rey Cuyos sa Homicide Section miingon nga ipa-ubos sa autopsy ang patay nga lawas ni Belda aron mahibaw-an ang hinungdan sa iyang kamatayon. Mokabat og 30 ka balay ang nasunog apan duna pay tulo nga partially damaged. Si Jocelyn Sentillo, usa sa mga nasunogan miingon nga iya na lang nabantayan nga nagsyagit-syagit ang iyang mga silingan tungod kay nakatulog na siya uban ang iyang bana.
Matud pa ni Sentillo nga wala lang siya nanumbaling tungod kay nagtuo siya nga nag-away lang ang iyang mga silingan ug nagbinoakay og bildo.
Apan mibangon siya ug iya na lang nakit-an nga nagdilaab na ang kalayo sa ilang mga silingan.
Nasunog og apil ang iyang balay apan wala kini hingpit maugdaw.
Ikaduha na kini nga sunog sa maong lugar ug matud pa sa mga residente huot na kaayo ang ilang lugar ug layo sa karsada maong maglisod gyud ang mga morespondeng bombero. Matud pang Relatado napulo ka hose ang ilang gisumpay-sumpay aron maabot ang nasunogan. Gisusi pa ni Relatado ang hinungdan sa maong sunog apan ang danyos niini miabot og P300 mil. (BANAT NEWS)