Saad gihimo aron pakyason

CEBU, Philippines - Ang administrasyon ni Talisay City Mayor Johnny V. Delos Reyes napakyas pagtuman sa ilang gisaad nga sweldohan nila sa miaging semana ang mga job order employees, upat ka magtutudlo ug ang kasamtangang presidente sa Talisay City College nga si Ritchel Bacaltos.

Gihulagway nga kutob lang sa saad ug wala sa buhat kay ang kagamhanan sa Talisay wala maka-sweldo sa mao nga mga kawani sa Talisay City College kaniadtong Martes nga maoy gisaad kanila.

Si City Legal Officer Alfredo Sipalay giingong mipahibawo nga walay kwarta ang siyudad alang sa mao nga gastohan.

Ang hingtungdan nga mga kawani, apil na si Bacaltos, nagpatabang sa Office of the Ombudsman-Visayas mahitungod sa wa pa nila madawat nga sweldo.

Sa hearing nga gihimo didto sa Ombudsman, ang mga opisyal sa Talisay giawhag nga hatagan na sa ilang sweldo ang mao nga mga kawani ug tahuron ang anaa sa gipirmahan nila nga kontrata.

Gipasabot sa Ombudsman nga kun magdumili si Mayor JVR paghatag sa ilang sweldo maisip kini nga kalapasan sa tawhanong katungod ug sa Anti-Graft and Corrupt Practices Act. Kini maoy rason nga ang city legal officer mipasalig nga ihatag kanila ang sweldo kaniadtong Martes apan wala kini tumana. (BANAT NEWS)