Mayor sa Cordova nasuko sa duha ka shipping company
CEBU, Philippines - Nasuko na si Cordova Mayor Adelino Sitoy sa pagpasa-pasa sa 2GO Shipping ug Sulpicio Lines kun kinsa kanila ang angay’ng mobayad sa gipangayong P125 milyones nga danyos sa Cordova tungod sa kadaut sa ilang kabakhawan human malunod ang m/v Saint Thomas Aquinas.
Matud ni Mayor Sitoy ang matag insurance company sa duha ka shipping lines nagpasahay kun kinsa kanila ang mobayad sa environmental insurance tungod sa nahimo’ng kadaut sa kadagatan sa Cordova nga nagusbat tungod sa oil spill gikan sa nalunod nga barko.
Kini maoy nakatukmod ni Sitoy nga iya na lang gipasakaan og kaso ang duha ka shipping company aron sila ang makabayad sa kadaut sa kabakhawan nga mokantidad og P125 milyones.
Ang mayor miingon nga kun madawat na niya ang mao nga bayad iya kini nga ipang-apod-apod sa mga barangay nga naapektohan sa oil spill depende sa ilang himoong assessment sa kadaot sa matag barangay.
Apil nga makabenepisyo sa ibayad unya sa duha ka shipping company mao ang mga mananagat sa mga dapit nga apektado sa maong oil spill nga wala makapanagat sulod sa pipila ka adlaw human malunod ang M/V Saint Thomas Aquinas nga iya sa 2GO shipping lines.
Ang barko nalunod human nga gidam-agan sa M/V Sulpicio Express Siete samtang ang barko sa 2GO Shipping nga giluwanan og mga 700 ka pasahero nagpaingon dinhi sa pantalan sa dakbayan.
Kapin sa 500 ka tawo ang namatay sa mao nga pagkalunod. (BANAT NEWS)
- Latest
