Mga opisyal sa Talisay gi-seminar sa DENR

CEBU, Philippines - Mga pangulo sa lainlaing departamento sa Talisay gipatambong og seminar kabahin sa Ecological Solid Waste Management didto sa Department of Environment and Natural Resources (DENR) kaniadtong Lunes.

Si Konsehal Antonio Bacaltos Jr., tsirman sa committee on environment, mibutyag nga ang maong seminar aduna’y kalambigitan sa tinguha sa dakbayan nga masulbad ang problema diha sa landfill sa Barangay Tapul.

Gitumong kini aron makakat-on ang mao nga mga opisyal og pamaagi pagsulbad sa problema ilabi na ang subsob nga pagsilaob sa labayanan og basura tungod sa methane gas.

Matud ni Bacaltos nga usa sa solusyon sa problema mao ang segregation o paglahi-lahi sa mga basura gikan sa malata, dili malata ug recyclable.      Si Bacaltos miingon nga kinahanglan nga ang mga residente o kabalayan mo-segregate na gayud sa ilang mga basura.

Ang landfill nagsige og puot ang aso niini ug mokalit lang og ulbo ang kayo tungod sa mga toxic gas gikan sa mga basura’ng nadugta.

Ang mga residente diha sa lugar mireklamo na niini sa kabalaka nga maapektohan ang ilang panglawas ug sa sitwasyon karon sa landfill ang mga scavenger apektado usab ang ilang panginabuhian.

Ang mga opisyal sa Talisay gimandoan na sa Ombudsman unsay ilang gihimo aron pagsulbad sa problema nga gireklamo sa mga molupyo duol sa landfill. Kun dili makasumitir og report ug action plan ang siyudad posibleng ang mayor mapasakaan og kaso.

Pipila ka adlaw ang milabay si Bacaltos ug mga kauban misuroy sa Solid Waste Management Project sa dakbayan sa Naga ug nagtoon sa ilang pamaagi sa paghipos sa mga basura.

Naobserbahan ni Bacaltos nga ang Naga wala na maproblema og mga sakyanan sa basura tungod kay ang pribadong kompaniya nga nagdumala sa Solid Waste Management Project sa siyudad mao nay nag-provide  sa mga sakyanan nga mangolekta og mga basura.

Ang maong pribadong kompaniya nagbutang usab kini og “call center” diin ang mga residente o mga establisamento sa siyudad adto motawag kun dunay basurang ipakuha. (BANAT NEWS)