Fil-Chinese firemen mihatag og donasyon
CEBU, Philippines - Ang Cebu Filipino-Chinese Volunteer Fire Brigade (CFCVFB) mihatag og mga fire-fighting equipment ngadto sa Command Control Center (C3) aron magamit kini sa kaugalingon niini nga mga bombero.
Ang gidonar naglakip sa unom ka heat-proof nga firemen’s jacket, 10 ka bag-o nga helmets, 10 ka bag-o nga boots, 10 ka trousers ug 19 ka fire-proof nga pantalon.
Si Wilton Uykingtian nga maoy fire marshall sa Filipino-Chinese Fire Brigade ug ang iyang pangabaga nga si Atty. Ronnie Gocuan maoy mitugyan sa mga donasyon ngadto ni Konsehal David Tumulak.
Misaksi usab sa turn-over ceremony sila si Simeon Romarate ug Alvin Santillana, ang pangulo ug puli-pangulo sa Cebu City Disaster Risk-Reduction and Management Office. Ang mga donasyon gihatag human nga ang 20 ka C3 volunteer firemen nakahuman sa ilang pagbansay-bansay nga gipasiugdahan sa mga sakop sa Fil-Chi Volunteer Fire Brigade.
Matud ni Santillana nga giuli na usab sa Filipino-Chinese Volunteer Fire Brigade ang tulo ka fire trucks nga gipahuwaman kanila sa dakbayan nga naglakip sa usa ka ladder-truck, water tanker ug pumper.
Ang fire marshall sa Fil-Chi Fire Brigade misaad nga mahimo’ng dugangan pa nila ang ilang donasyon sa umaabot nga mga adlaw aron nga makatabang sila pagpalambo sa City Hall fire fighters. (BANAT NEWS)
- Latest
