Polis nakiglayog sa tulisan naangol
CEBU, Philippines - Angol ang usa ka polis human nag-inilogay kini sa kutsilyo tali sa usa ka lalaki nga mitulis sa mga pasahero sa jeep s kagahapon sa buntag sa barangay Carreta sa dakbayan sa Sugbo.
Ang nakasikop sa tulisan naila nga si Insp. Delfin Bontuyan sa Criminal Investigation and Detection Group 7 nga samdan sa iyang walang bukton tungod sa pakig-inilogay nila sa kutsilyo sa suspetsadong si Narciso Medina, 25, nga taga Carreta.
Ang biktima naila nga si Alfie Dagatan, 20, nga misakay sa jeep gikan sa Colon padulong sa North Bus Terminal.
Nasayran sa mga tigbalita gikan sa biktima nga gidemalas sila nianang adlawa tungod kay una pa sila misakay sa maong jeep pasaheroan nakamulta sila sa dalan Colon tungod sa jaywalking.
Wa dayon gihatag sa biktima ang iyang silver nga kuwentas ug nag-inilogay pa sila sa suspetsado. Si Bontuyan nga nagsunod sa jeep nga gisakyan sa suspetsado ug sa biktima luwan sa iyang awto nakabantay sa kagubot sa sulod sa maong jeep maong iya kining gisusi.
Atol sab kaayo nga ang tulisan didto pa sulod sa jeep maong iya kining gisaka ug nakig-inilogay sa kutsilyo apan nasamdan siya sa walang kamot, tungod kay gahi gyud ang tulisan, gibukbok niya kini sa puloan sa iyang pistola.
Narekober ni Bontuyan ang usa ka silver nga kuwentas nga balor P3 mil nga iya sa biktima ug nasikop niini ang suspetsado. Apan nakuhaan pa gyud kini og duha ka pakete nga shabu dihang girekisa kini sa kapolisan.
Matud pa sa suspetsado nga nahimo lang niya ang pagtulis sa biktima tungod kay nag-away siya ug ang iyang kapuyo. (BANAT NEWS)
- Latest
