CEBU, Philippines - Napalgan nga patay ug naputos sa dinunggaban ang usa ka lalaki nga giingong nagpadagan og usa ka drug den sa White Road, barangay Inayawan sa dakbayan sa Sugbo pasado alas 5:00 kagahapon sa buntag.
Ang namatay naila nga si Domingo Marañan, 50, kansang patay’ng lawas naputos og dinunggaban sa gawas sa iyang balay.
Base sa imbestigasyon nila ni SPO1 Ruth Violango sa Homicide Section nga uwahing nakit-ang buhi ang biktima samtang natulog pa kini sa lantay sa gawas sa iyang balay.
Nasuta usab sa pagsusi sa kapolisan sa balay niini, duna kini duha ka mga lawak nga dunay daghang drug paraphernalia ug lamparilya nga gituohan nilang drug den.
Matud pa ni Violango nga ang mga silingan sa biktima miingon nga nagpadagan kini og drug den. Pasado alas 5:00 na sa buntag napalgan si Marañan nga naligo na sa iyang dugo ug naputos na sa dinunggaban.
Wala na kini vital signs dihang gihiling sa mga sakop sa Inayawan Rescue Unit ug gideklarar na kini nga patay na.
Wa pa matino ang motibo ug kung kinsa ang kriminal, apan nagtuo ang kapolisan nga may koneksyon kini sa illegal drugs. (BANAT NEWS)