CEBU, Philippines - Tungod sa kabaga sa panganod sa Bohol, eroplano nga may dalang 100 ka pasahero gikan sa Manila padung sa Tagbilaran City mi-divert sa Mactan Cebu International Airport (MCIA), samtang laing duha ka flights usab ang nadelatar gumikan gihapon niini kagahapon sa buntag.
Si Gemma Imbong sa Operation Division sa MCIA sa interbyu sa usa ka sibyaanan mibutyag nga ang Cebu Pacific flight 53647 nga may kapin sa 100 ka mga pasahero motugpa sa Tagbilaran unta alas 9:40 ang takna sa buntag kagahapon. Apan tungod sa kabaga sa panganod, ulan ug hangin gi-divert ang maong flight sa MCIA ug nitugpa kini sa mga alas 9:53 sa buntag kagahapon apan nipadayon sa biyahe paglabay sa alas 11:00 sa buntag paingon sa Tagbilaran city. Gawas niini may usa usab ka international flight sa Cebu Pacific flight Cebu-Narita, Japan ug ang domestic flight nga Cebu Pacific Cebu - Bacolod flight nga gikatakda unta nga mogikan sa alas 8:00 sa buntag kagahapon.
Samtang gipahibawo sa buhatan ni MCIA General Manager Nigel Paul Villarete nga ang ilang Mactan airport gipaubos usab sa heightened alert subay sa pagdagsa sa mga pasahero sa airport sa Mactan atol sa paghandum sa Semana Santa ilabina karong adlawa, Miyerkules Santo. (BANAT NEWS)