CEBU, Philippines - Kritikal ang kahimtang sa usa ka 34-anyos nga ginang human kini unaya sa pagluba sa iyang bana tungod sa selos kagahapon sa buntag didto sulod sa kanhi nila’ng balay sa Sitio Ibabao, Barangay Agus, dakbayan sa Lapu-Lapu.
Ang biktima nga si Annabelle Ngojo, 34, taga Sitio Sudtongan, Barangay Basak, Lapu-Lapu nga nakaangkon og mga samad dinunggaban sa lawas dali nga gidala sa Lapu-Lapu City District Hospital apan gibalhin ngadto sa Vicente Sotto Memorial Medical Center.
Ang bana sa biktima nga si Ravelo Ngojo, 35, daling misibat human sa insidente ug padayon pa kining gipangita sa kapolisan.
Si PO1 Anthony Piencenaves sa Lapu-Lapu City Police Office homicide section mibutyag sa Banat News kagahapon nga giingong nagselos ang suspetsado sa iyang asawa.
Sa wala pa mahitabo ang insidente ang biktima milakaw kini ug giingong gisundan sa iyang bana ug naabtan ang iyang asawa ug higala niining gihinganlan og “Kid†nga nag-istorya sulod sa kanhi nila balay sa Sitio Ibabao.
Si Kid kinsa nakakita sa suspetsado dali nga milayat sa bentana sa balay ug giingong ang biktima maoy gipahimungtan sa suspetsado.
Si Piencenaves mibutyag nga nakadawat sila og report nga ang suspetsado napriso na kini kaniadto apan susihon pa nila kung unsay kaso niini sa iyang pagkapriso. (BANAT NEWS)