Nitulis sa policewoman nadakpan
CEBU, Philippines - Nagtingkagol karon sa Carbon Police Station ang duha sa tulo ka suspek sa pagtulis sa usa ka tulo ka semanang mabdos nga policewoman nga nadestino ra usab sa maong buhatan niadtong Martes sa hapon.
Giila ang nabiktima nga si PO1 Vil Ann Magpantay, 25, minyo, taga Sugpongan, Lapu-Lapu City ug nadestino isip beat police sa Carbon Police Station.
Sumala pa sa hepe sa Carbon Police Station Police Chief Inspector Noel Lomente nga nagsibilyan lang si Magpantay samtang naglakaw subay sa dalan sa El Filibusterismo paingon na pauli giduol ug gitionan kini og kutsilyo dayong kuha sa iyang pitaka nga adunay sulod nga moabot sa P5,000.
Apan human nahatag sa pulis ang iyang pitaka ug mipalayo na ang mga tulisan iya kini nga gigukod kauban ang mga estambay ug barangay tanod hangtud nga nasikop ang duha sa tulo ka mga suspek nga giila nga sila si Randolf Quiano, 25, taga Labangon ug usa ka 16- anyos nga lalaki.
Ang ikatulo nga suspek nga nailhan sa pangalan nga Michael maoy nakaipsot ug anaa kaniya ang pitaka sa biktima. Si Quiano nagkanayon nga si Michael maoy mitulis ni Magpantay ug naamong lang sila sa maong panghitabo. Apan nasayran nga makadaghan na usab nasikop si Quiano sa kapulisan tungod sa mga pagpangawat. (BANAT NEWS)
- Latest
