Suspek sa archival ambush gikiha na
CEBU, Philippines - Gipasaka kagahapon sa National Bureau of Investigation (NBI)-7 sa Cebu Provincial Prosecutor Office ang kasong kriminal batok sa mga opisyales sa Highway Patrol Group (HPG)-7 kinsa maoy gipasanginlang mi- ambush kang Atty. Noel Archival ug kaubanan niini, usa ka buwan na ang nakalabay.
Atty. Jose Erme Monsanto ug Atty. Renan Oliva miingon nga ang gikasohan mao sila si Sr. Supt. Romualdo Iglesia; Sr. Supt. Joselito Lerion; Chief Insp. Eduardo Mara, SPO4 Edwin Galan, PO1 Alex Bacani, pulos mga sakop sa HPG-7 ug daghan pang “John Does.â€
Matud pa sa NBI lig-on kaayo ang mga ebidensya sa kasong multiple murder ug frustrated murder batok sa maong suspek.
Si Archival, Alejandro Jayme, Candido Miñoza namatay tungod sa mga igo sa bala niadtong Pebrero 18, 2014 sa ala 1:00 sa hapon sa barangay Coro, Dalaguete, samtang padung na sila pauli sa Cebu City gikan sa usa ka court hearing sa Dumaguete City, bugtong si Paolo Cortes ra mao ang lone survivor sa maong ambush. Ang testimonya ni Cortes matud pa mitakdo sa recordings sa closed-circuit television (CCTV) nga nakuha sa Dalaguete. Matud sa NBI nga dunay nakuha nga M16 empty shells sa crime scene nga mitakdo sa empty shell sa M16 nga na-recover nila ug sa Special Investigation Task Group sa Cebu Provincial Police Office sud sa pula nga Vios.
Giingon nga sa wala mahitabo ang ambush, daan nang mitug-an sa mga kabanay ug kahigalaan si Archival bahin sa nadawat niyang hulga sa kinabuhi gikan sa mga operatiba sa HPG7 tungod sa kasong kriminal nga iyang gipasaka batok nila diha sa Office of the Ombudsman ug sa korte. Dunay gipa-blotter siArchival sa Mabolo Police Station nga si Lerion ug mga kauban niini sa HPG misuway og kilkil og P200,000 sa iyang kliyente nga si Jane Catherine. Base usab sa ebidensya nga ilang nakuha kauban ang PNP nga si Lerion maoy sigeng makitang mag-drive sa Toyota Vios nga giingong kapareho sa sakyanang gigamit sa ambush nga may plakang GSC 675.
Sumala pa sa complaint sa NBI, base usab sa logbook entries sa impounding compound sa HPG-7 sa Sudlon, Lahug, Cebu City, nga niadtong buntag sa Pebrero 17, 2014, usa ka gray Mitsubishi Strada nga may plakang NVO 543 nga gimaneho ni Iglesia ang migawas sa HPG-7 Impounding Compound.
Pebrero 18, 2014 sa alas 9:42 sa buntag ang Toyota Vios nga may plakang GSC 995 gimaneho ni Lerion migawas sa HPG-7 Compound.
Alas 3:38 sa hapon sa Pebrero 18, human sa ambush ang Toyota Vios nga gimaneho ni Lerion mibalik og sud sa HPG7 impounding compound. Pag-abot sa alas 4:42 sa hapon, miabot usab ang gray Mitsubishi pick up nga may plakang NVO 543 nga gimaneho ni Iglesia ug misud sa HPG7 compound. Matud pa sa NBI ang plate numbers GSC 995 ug NVO 543 wa na makit-i nga gi-attached sa bisan asa nga gi-impound nga sakyanan sud sa HPG-7 impounding area. Atol sa gihimong surveillance, nasuta nga ang HPG-7 personnel matud pa magsige og ilis-ilis sa mga nagkalain-laing plaka sa mga sakyanan.
Matud sa NBI kasohan usab nila karong adlawa og administratiba ang HPG officials sa Office of the Ombudsman-Visayas. (BANAT NEWS)
- Latest
