CEBU, Philippines - Gihingusgan karon sa Land Transportation Franchising and Regulatory Board (LTFRB-7) ug Land Transportation Office (LTO-7) ang pag-monitor sa mga bus dinhi sa lalawigan sa Sugbo ug ubang probinsiya sa Central Visayas atol sa kasaulogan niining Semana Santa.
Sigon pa ni LTFRB-7 Regional Director Ahmed Cuizon nga nag-una sa ilang gisusi sa ilang inspeksyon sa mga bus terminals mao ang mga dokumento niini sama sa prangkisa ug sa special permit.
Gitutukan usab nila ang ang road worthiness sa mga bus ilabina sa pagsusi kun ni-function ba ang preno ug mga lights sa sakyanan aron malikayan ang aksidente.
Si Cuizon miingon usab nga ang ilang buhatan uban ang LTO-7 nitutok usab niadtong kolurom nga mga bus ug mga jeepneys o sakyanan nga namasahero bisa’g walay prangkisa o special permit.
Samtang si LTO-7 regional director Arnel Tancinco miingon nga gitutokan nila karon ang mga bus nga nag-overloading ug ilaha kining buhaton sa ipamutang nga roadside inspections. (BANAT NEWS)