CEBU, Philippines - Giaprubahan na sa Land Transportation Franchising and Regulatory Board kon LTFRB-7 ang gipangayong special permit sa Valla Car Transit aron ang ilang mga bus makabiyahe gawas sa ilang rota.
Gibutyag ni Reynaldo Elnar, transportation developement officer sa LTFRB-7 nga 50 ka units sa mga Ceres bus ang gi-apply sa Valla Car transit.
Matud ni Elnar nga sa paghatag nila og special permit ilang ibutang kung asa mobiyahe ang bus ug epektibo lang kini gikan sa Abril 13 hangtud sa pagka-petsa 21. Ang 50 ka bus nga nahatagan og special permit sagad may mga biyahe sa habagatang bahin sa Sugbo tungod sa kadaghan sa mga pasahero.
Tugutan usab nila nga makakuha og permit ang mga mini-bus pinaagi sa ilang mga tawo nga naa sa terminal aron mao nay mo-isyu sa special permit.
Gipaniguro sa LTFRB-7 nga mohatag sila og special permit niadtong mga klaro nga operators ug way mga kolurom nga makalusot. (BANAT NEWS)