Gipangputol nga kahoy mokantidad og P1.9M

CEBU, Philippines - Mokabat og dul-an P1.9 milyones ang mahimong mabayran sa  WT Construction  ngadto sa City Parks and Playgrounds Commission ilis sa mga kahoy nga nawala sa Serging Osmeña Blvd.

Pailisan sa Executive Director sa City Parks and Playgrounds Commission nga si Librado Macaraya sa maong kompanya ang 88 ka mga kahoy nga gipamutol tungod sa road rehabilitation project sa Department of Public Works and Highways sa nahisgutang dalan.

Nigawas sa imbestigasyon nga ang plate number sa trak de karga nga gigamit sa pagpanghakot sa mga kahoy nakarehistro sa WT Construction Inc. nga maoy nakakontrata sa DPWH.

 â€œI don’t mind if a case will be filed. My only concern here is the trees to be replaced,” matud pa  ni Macaraya dihang gipangutana sa iyang lugar kabahin sa maong kaso.

Si Macaraya usa sa mga nangulo sa pagpangandam sa International Eucharistic Congress nga pagahimuon karung Enero 2016 dinhi sa Sugbo ug trabaho niyang paninduton ang siyudad sa maong adlaw.

Matud pa ni Macaraya nga dangtan pa og usa ka tuig ang pagpananum og mga kahoy sa mga nahisgutang lugar ug dili na angayan pa nga huwaton ang tuig 2016 una pa molihok.

Samtang ang Department of Environment and Natural Resources (DENR-7) ug city legal officer Atty. Gerone Castillo nagtagbo niadtong adlaw’ng Biyernes ug naghisgot kalabot sa kopya sa CCTV footage sa earth-balling activity sa dan S. Osmeña.

Matud ni Dr. Eddie Llamedo tigpamaba sa DENR-7 ila na lang hangyuon ang CENRO nga isuwat ang mga importanteng detalye nga ilang makita sa CCTV footage aron maoy gamiton nilang suporta sa ipasakang kaso batok sa WT Construction. Kini human wa itugot nga makakuha og kopya niini ang DENR, apan gipahibalo niya nga kun gikinahanglang mokuha sila og court order aron mapalig-on ang kaso ilaha kining buhaton.

Gipaabot nga sa dili pa ang Huwebes Santo mapasaka na nila ang kaso nga kalapasan sa Presidential Decree 953 batok sa WT Construction. (BANAT NEWS)