CEBU, Philippines - Padayong naka-alerto ang mga kawani sa Toledo City Veterinary Office sa pagbantay sa pantalan sa posibleng pagpalusot og mga endangered animals nga gikan sa isla sa Negros Occidental ug Negros Oriental ug silingang lungsod.
Matud ni Dr. Nelcy Garton, head sa Toledo City Veterinary Office nga usa siya sa mangunay sa pag-inspeksiyon ug mag-atang sa pantalan apan duna gyu’y duha ka mga kawani sa veterinary office nga magbantay sa pantalan matag adunay moabot nga barko gikan sa San Carlos City Negros Occidental.
Nagkanayon usab ang maong opisyal nga pahugtan nila ang ilang pagbantay panahon sa paingon gabii tungod kay nakadawat siya og report nga maoy sagad ipalusot ang mga nagnihit na kaayong mga ihalas nga mga mananap.
Mibahad si Garton nga ilang pasakaan og kasong kalapasan sa Republic Act 9147 o The Wildlife Resources Conservation and Protection Act ang masakpan nga magpalusot og kahayupan.
Apan ang Toledo City wharf wala’y X-ray machine nga magamit sa pag-inspeksiyon sa mga bagahe sa pantalan hinungdan nga mano-mano ang paghimo niini. (BANAT NEWS)