Estudyante hatagan og trabaho sa Toledo
CEBU, Philippines - Dili momenos sa 105 ka mga estudyante ug out of school youth ang hatagan og kahigayunan nga makatrabaho karong summer sa kagamhanan sa dakbayan sa Toledo ubos sa Special Program for Employment of Students kun SPES.
Kini ang gikumpirmar ni Mary Grace Mata Administrative Aide VII sa Toledo City Human Resource Management and Development Office (HRMDO).
Dugang ni Mata ang mga estudyante ug out of school youth nga nagpangidaron og 15 ngadto sa 24-anyos ang ilang dawaton ug makatrabaho.
Gawas sa ubang requirements ang out of school youth kinahanglang mokuha og certificate of good moral gikan sa ilang barangay.
Sa pagkakaron adunay 34 palang ka mga aplikante ang gidawat sa Toledo HRMDO.
Gikatakda usab sa adlaw’ng Lunes Abril 15, 2014 ipahigayon ang orientation sa mga madawat nga mga aplikante.
Magdawat usab og tag P250 kada adlaw ang maong kabataan isip sweldo nga molanat og sulod sa 20 ka adlaw wala’y labot ang holidays ug sa adlaw nga Sabado ug Domingo.
Ang SPES pinasubay kini sa Department of Labor and Employment kon DOLE ug wala’y nalapas nga balaod sa proteksyon sa kabataan ang maong programa. (BANAT NEWS)
- Latest
