Gipapatay sa drug pusher

CEBU, Philippines - Usa ka lalaki nga gikatahong molukat sa iyang motorsiklo ngadto sa giprendahan niini nga gikatahong namaligya og illegal drugs gipusil patay diha sa sitio Ibabao,  Pusok dakbayan sa Lapu-Lapu sa milabay’ng gabii.

Ang gipusil patay mao si Erwin Yamyamin Apostol, 30, taga sitio Lipata sa mao gihapong barangay.

Sa pasiunang imbestigasyon ni SPO2 Manolito Abellanosa ug PO2 Jerson Alparito sa Homicide Section, base sa impormasyong gibutyag sa kapuyo ni Apostol iyang nakit-an ang biktima nga nagbarog-barog sa hilit nga dapit sa sitio Ibabao kay duna kini gipaabot.

Sumala pa nga paglabay og pipila ka gutlo, duha ka wala mailhing tawo nga nag-jacket ang nangabot ug diretsong gipusil si Apostol sa ulo ug liog, patay na kini pag-abot sa tambalanan.

Samtang nakuha sa kapulisan ang usa ka pitaka nga adunay sud nga balor og  P9mil kapin sa nahitaboan nga gituohang iya sa biktima hinungdan nga dili tulis ang motibo niini.

 Atol sa imbestigasyon, ang kapuyo ni Apostol gikatahong mitug-an nga tiggamitan og drugas ang biktima ug naprenda niini ang ilang motor ngadto sa usa ka naila sa pangalang "Ago" nga usa ka drug pusher sa ilang lugar.

Niadtong gabhiuna lukaton na unta ni Apostol ang motor  apan giingong nagmagahi na ang maong drug pusher nga iuli ang motor kay naremate na kini ug naprenda na sa lain.

Gumikan niini mihulga si Apostol nga magdala og pulis kung dili niya malukat ang motor. Sumala pa nga nakadawat og text si Apostol nga makigkita si Ago kaniya sa maong dapit apan lain ang miabot nga duha ka tawo nga mipusil patay sa biktima. (BANAT NEWS)