Kanhi garbage collector nag-pusher

CEBU, Philippines - Kanhi garbage collector sa Barangay San Antonio, dakbayan sa Sugbo nadakpan sa kapolisan nga namaligya og shabu didto sa Barangay Mabolo kaniadtong Huwebes sa hapon.

Si Manny Epe Flores, hingkod ang panuigon, ulitawo ug nagpuyo na karon sa dalan Urot, Barangay Mabolo, nadakpan sa mga sakop sa City Anti-Illegal Special Operations Task Force (CAIDSOTF).

Ang team sa kapolisan nga gipangulohan ni Senior Inspector Eunil Avergonzado misugo og usa ka poseur buyer nga mopalit og shabu ni Flores kay aron pagmatuod kun namaligya ba siya og illegal nga drugas.

Dihang gitunol na ni Flores ang usa ka pakete nga shabu, siya abtik nga gidakop sa mga polis nga diha ra diay sa palibot.

Pagrekisa sa mga polis kang Flores, nakuhaan pa siya og laing 16 ka pakete nga shabu nga diha sa iyang bulsa. Ang mga opisyal sa Barangay San Antonio nga ubos ni Kapitan Allan Masecampo miingon nga dugay ra nila nga gitaktak si Flores sa pagka garbage collector tungod sa mga bati nga kalihukan.

Gikatakda kagahapon sa hapon nga ang dinakpan pasakaan na og duha ka buwag nga kaso didto sa fiskaliya kabahin sa pagbaligya ug paghupot og gidili nga drugas. (BANAT NEWS)