CEBU, Philippines - Napasaka na ang kasong illegal logging sa prosecutor’s office batok sa mga responsable nga namutol og kahoy sa Osmeña Reforestation Project sa Department of Environment and Natural Resources-7 sa barangay Manipis sa dakbayan sa Talisay.
Kasong kalapasan sa Presidential Decree no. 705 kon illegal logging ang giatubang karon nila ni Marciano Silva, chainsaw operator, Manipis Barangay Councilor Eduardo Abalo nga giingong maoy mi-request sa pagputol sa kahoy ug Isidro Silva maoy nag-alsa sa kahoy paingon sa Talisay City Hall.
Ang tulo maoy positibong gitudlo ni forest guard Leo Togonon kalabot sa gihimong pagpamutol og kahoy.
Si Togonon mibutyag nga iyang nakita sila si Talisay City Mayor Johnny De los Reyes ug igsuon niini nga si Joel sa maong lugar apan di siya kasulti kun ang duha lakip ba sa namutol sa kahoy.
Siya mitataw nga ang makatudlo ra gyud kun kinsa ang ubang namutol sa mga kahoy mao ang tulo nga gipasakaan og kaso. Si Joel De los Reyes sa iyang bahin mibutyag nga kadtong mga mitestigo sa reklamo giingong giango-ango ug adunay nagpaluyo sa maong hitabo.
“Naay nagpaluyo ana, di makita pero klaro. Mao nay tinuod, naay nangdaot kang JVR (mayor),†sumala pa ni Joel.
Hinoon alang kang Togonon di siya makabuot sa unsay anaa sa huna-huna sa kampo sa mayor ug ang ilaha lang mao ang pagbadlong nga ihunong ang pagpamutol og kahoy nga walay permit. Ang Provincial Environment and Natural Resources kon PENRO mibutyag nga wa malakip sa kaso ang mayor ug igsuon niini nga si Joel tungod kay base sa gihimong pagsusi walay igong ebidensiya nga magtumbok kanila nga apil sa pagpamutol sa kahoy.
Tulo ra usab ka pangalan ang gibutyag sa mga saksi apan bisan pa man niini ang PENRO mipasabot nga mahimo pa gihapong maamendahan ang kaso kung dunay idugang sa mga kasohan, kini kun duna nay mga ebidensya nga makasuporta sa kaso batok kanila.
Nasayran nga nahitabo ang pagpamutol niadtong Marso 5 ug 6 ning tuiga diin lima ka punoan sa mahogany ang naputol nga anaa sa 2,806 board feet ug gibana-bana nga mokantidad og dul-an P100 mil.(/EIM)(BANAT NEWS)