Trak way prangkisa

CEBU, Philippines - Gitug-an ni Land Transportation Franchising and Regulatory Board (LTFRB-7) Regional Director Ahmed Cuizon nga walay prangkisa ang trak de karga nga nadisgrasya didto sa sitio Mabugnao barangay Guadalupe siyudad sa Carcar niadtong Huwebes sa udto nga nakapatay og pito ka mga tawo ug pagkaangol sa 24.

Sigon pa ni Cuizon nga ang trak de karga nga gimaneho ug gi-operate ni Mario Panulagan nga may plate number GDV- 259 walay record sa ilang buhatan nga may prangkisa.

Gitug-an usab ni Cuizon nga ilegal usab ang paghakot ni Panulagan sa mga kahayopan ug mga tag-iya niini gikan sa Mantalongon, Dalagute paingon sa siyudad sa Carcar sanglit  green plate kini ug dili vehicle for hire.

"Number one, wa sila’y prangkisa to operate as a truck for hire. Ikaduha (he is) illegally transporting passengers and this is a truck, it should not operate like a bus or PUJ," sigon pa ni Cuizon sa usa ka radio interview.

Giklaro ni Cuizon nga dakong kalapasan ang gihimo sa driver ug operator sa naasoy nga trak de karga sanglit nag-operate kini sama og usa ka kolurom nga sakyanan.

Iyang gitumbok nga P6 mil  nga multa ang nagpaabot nga ipahamtang ni Panulagan tungod sa maong kalapasan.

Apan iyang gitataw nga ang Land Transportation Office (LTO-7) na ang mopahamtang og silot ug modisiplina sa naasoy nga driver ug operator  tungod sa kalapasan nga nahimo niini sanglit dili man kini vehicle for hire nga sakyanan.

Giawhag ni Cuizon sa mga tag-iya og mga sakyanan nga di gamiton alang sa public transport ang mga sakyanan nga walay prangkisa gikan sa ilang buhatan.

Si Reynaldo Elnar, transportation development officer sa LTFRB-7 miingon nga ang usa ka trak de karga di gyud angay sakyan og mga tawo.

Karong Abril 15 ang mga sakop sa LTFRB-7 mosusi sa mga terminal aron pagsiguro nga way mga kolurom nga sakyanan ang makabyahi atol sa Semana Santa.

Subli silang nanawagan nga likayan ang overloading ug di mopadagan og mga sakyanan nga walay prangkisa nga gigamit sa public transport.

Siyam na lang ka mga naangol ang padayong giatiman sa Vicente Sotto Memorial Medical Center samtang wala nay nadugang pa sa mga nakalas sumala pa ni Dr. Emmanuel Gines.  (/EIM)(BANAT NEWS)