Swedish nagdala og pusil ug marijuana nasikop

CEBU, Philippines - Nasikop sa kapolisan ang usa ka Swedish national nga nasakpan’g nagdala og armas ug marijuana dihang gihiling sa gwardya sa usa ka call center ang iyang bag kaniadtong Miyerkules sa hapon didto sa dalan Tres Borces, Barangay Kasambagan, dakbayan sa Sugbo .

Nagtingkagol sa karsel sa Cebu City Police Office (CCPO) si Andreas Mikail Larrsamils, 35, kasamtangang nagpuyo sa Barangay Tisa, dakbayan sa Sugbo human maimbargohi og kalibre .22  nga Magnum revolver ug mga linikit nga marijuana.

Si Chief Inspector Romeo Santander, hepe sa City Intelligence Branch (CIB) mibutyag nga mismo ang tag-iya sa call center maoy misumbong sa kapolisan nga ang maong langyaw magpunay og anha sa call center ug magdala-dala og pusil.

Ang langyaw wala magtrabaho sa call center ug gikatahapan nga magdala ra og marijuana sa ubang call center agents nga mga     adik.

Dihang misulod na unta si Larrsamils gisusi sa gwardiya ang iyang gamit ug nakita sa gwardiya sulod sa bag ang nahisgutang pusil ug mga linikit nga marijuana

Atubangan sa gwardiya, ang langyaw gisikop sa mga sakop sa CIB nga nag-atang na’ng daan niadtong higayona.

Susihon usab sa kapolisan ang record sa langyaw kung dili ba kini over-staying alien sanglit tourist visa lang ang gihuptan niining dokumento sa iyang pagpuyo dinhi sa nasud. (BANAT NEWS)