Multa sa madakpan’g drayber pausbawan

CEBU, Philippines - Ang Land Transportation Office (LTO) ug Land Transportation Franchising and Regulatory Board (LTFRB) mipahigayon og public consultation kagahapon sa pagpatuman og usbaw sa multa sa traffic violations.

Ang maong public consultation gitambongan sa kadagkoan sa LTO-7, LTFRB-7 ug nagkalain-laing transport group aron makapadayag sila sa ilang mga reklamo ug matubag dayon sa hingtungdang ahensiya.

Matud ni LTO operations chief Joel Maloloy-on nga ang maong konsultasyon importante kaayo aron usab nga makapadayag ang mga transport sector sa ilang mga pangutana una pa hingpit nga i-implementar ang memorandum circular.

Nasayran nga ang multa sa mag-drive nga walay lisensya himoon na nga P5 mil, P10 mil sa paggamit sa sakyanan sa krimen, ang reckless driving, P3 mil sa unang kalapasan, P5 mil  sa ikaduha’ng kalapasan ug P10 mil sa ikatulo’ng kalapasan.

Gawas niini, P5 mil usab ang multa sa masakpan nga misumiter og peke nga mga dokumento aron makakuha o maka-renew sa ilang lisensya, P50 mil ang multa sa masakpan nga nag-operate og right hand drive motor vehicle ug ang mga kolurum nga mga sakyanan kun masakpan ang drayber makamulta gikan sa P6 mil ngadto sa P1 milyon.

Gihulagway sa duha ka ahensiya nga ang pag-usbaw sa multa makatabang nga wala nay mga operator ug motorista nga molapas sa mga lagda sa trapiko.

Apan ang transport group sa ilang bahin mipiyait gumikan sa kadako sa multahan ug nanawagan sila sa LTO ug LTFRB nga tan-awon usab ang ilang kahimtang.

Si Julieto Flores presidente sa Cebu South Minibus Association mihulagway nga dili makiangayon ngadto kanila ang kadako sa multa hinuon gitakda sila’ng moduso og baruganan nga mosuporta sa ilang hangyo.  (BANAT NEWS)