2 most wanted, pugante nasikop

CEBU, Philippines - Nasikop sa kapulisan ang duha ka mga lalaki nga gitumbok nga mga most wanted sa managlahing lungsod sa probinsya sa Sugbo. Si  Juanito Flores Jr. 36-anyos  lumad nga taga barangay Dob-dob lungsod sa Badian nga giila nga ikalima nga most wanted sa kapulisan sa Badian.

Nasikop  si Flores ni SPO1 Geremias Elardo ug kaubanan sa Badian Police Station samtang nanglaba  kini sa usa ka sapa. Nasayran nga nag-atubang og kasong murder ug frustrated murder si Flores niadtong tuig 2008.

Nadakpan usab si Alizer Polyante, 56, taga Sierra Bullones, Bohol apan kasamtangang nagpuyo sa barangay Tajao sa lungsod sa Pinamungahan nga gihulagway nga ikatulo nga most wanted sa maong lungsod.

Nasikop si Polyante pinasikad sa warrant of arrest nga giluwatan ni Presiding Judge Ruben Altubar sa Regional Trial Court RTC-Toledo Branch  29. Si Polyante nag-atubang og kasong kalapasan sa Republic Act 9165 o paghupot og illegal nga drugas niadtong 2012.  Samtang nasikop sa mga sakop sa Regional Public Safety Battalion 7, Tanjay City police ug Samboan police ang usa ka pugante nga may kasong homicide ug attempted rape kagahapon sa buntag sa sitio barangay Poblacion sa lungsod sa Samboan. Ang nasikop naila nga si Bannie Romano alyas Bonie, nga lumad nga taga Tanjay City sa Negros.  Gibiyahe na padung sa Tanjay City ang suspek. (BANAT NEWS)