Geohazard advisory gipagawas sa DENR tungod ni “Domeng”

CEBU, Philippines -  Ang tropical depression Domeng nagdala og hulga tungod kay giingong moigo kini sa Central Visayas karong Huwebes hinungdan ang Department of Environment and Natural Resources (DENR-7) mipagawas na og geohazard advisory threat ilabi na dinhi sa Sugbo ug Bohol nga  giingong moagi ang bagyo.

Matud ni Dr. Eddie Llamedo tigpamaba sa DENR-7 nga ilang ipadala ang threat advisory sa landslide ug pagbaha ngadto sa buhatan sa gobernador ug mayor sa probinsiya sa Sugbo ug Bohol.

Samtang si Dr. Lakshmi Legaspi, assistant regional director sa Department of Health (DOH-7) miingon nga nangandam na silang tanan sa panginahanglanon alang sa kalamidad.

Ang DENR-7 miingon delikado sa mga pagbaha ug landslide ang lungsod sa Oslob, Santander, Argao, Ronda, Dumanjug ug Pinamungahan kansang mga barangay  taas og tsansang lunopan.

Sa dakbayan sa Sugbo, kapin sa 20 ka mga bukirang barangay ang nabutang sa landslide prone area ug lima ka barangay ang sagad nga bahaan.

Samtang bisan pa kung gipaubos na lang sa low pressure area o LPA sa Philippine Atmospheric Geophysical and Astronomical Service Administration (PAGASA) ang bagyong Domeng  ang  City Disaster Risk Reduction Management Council (CDRRMC) sa dakbayan sa Lapu-Lapu di mokompiyansa.

Gialerto sud sa 24-oras ang CDRRMC hangtod nga mobiya na sa nasud ang maong bagyo ug ilang gimuntar ang "rain gauge."   (BANAT NEWS)