CEBU, Philippines - Usa ka alimpus ang midaro sa dul-an 30 ka mga panimalay ug mga estraktura sa barangay Alaska-Mambaling kagahapon sa hapon hinungdan sa pagkawalis sa mga atop sa kabalayan ug sa Sports Complex sa maong dapit.
Matud ni Simeon Romarate, executive director sa Cebu City Disaster Risk Reduction and Management Office nga gikahinabi sa Banat News mibutyag nga nagsugod ang alimpus alas-2 sa hapon.
Si Romarate diha sa South Road Properties dihang kalit nga niitom ang langit ug nikalit og kakusog ang bawod ug nakita niya ang alimpus mitugpa sa Mambaling.
Matud pa dunay duha ka tawo ang nakahiagom og gamay nga samad. Sa laing bahin, giklaro sab ni Tisa barangay Captain Philip Zafra nga walay kadaot nga namugna sa ilang barangay ang alimpus.
Gikompirma sa Philippine Atmospheric, Geophysical, and Astronomical Services Administration (PAGASA) Mactan nga usa ka alimpus ang miigo sa Mambaling.
Matud ni Al Quiblat, pangulo sa maong buhatan nga nasigpatan sa ilang opisina ang pagporma sa “cumulonimbus†nga panganod dapit sa Mambaling.
Si Mambaling barangay kaptain Willy Go miingon nga naapektahan ang sitio Viking, Badjaoan, ug Nava ug wala silay kuryente kagabii. Nagrabehan mao ang covered court sa sitio Viking kay 90 porsiyento sa atop niini ang milupad.
Si CCDRMMC chief of operations Alvin Santillana nagkanayon nga padayon pa ang pag-assess sa kinatibuk-an nga danyos sa maong lugar.
“Kun dili mi manggunit, manglupad man gyud mi sa kakusog sa hangin,†matud pa ni Dionesio Etcuban nga diha sa covered court ug mihulagway nga mas kusog pa ang hangin niini kun itandi sa super typhoon Yolanda.
Gisaysay ni Go nga sa Sitio Badjaoan, dili mo minus sa traynta ka balay ang nangaguba ug gipanglupad ang mga atop ug mga bungbong. Karong adlawa dunay special session ang barangay aron tukion ang maong insidente.
Si John Lignuwan, lumolupyo sa Badjaoan, nagkanayon nga pag-abot sa kusog nga hangin sa ilang lugar nangambak sila sa dagat tungod sa kahadlok. (Mechelle P. Florita , Michael H. Braga ug Jean Marvette A. Demecillo/EIM) (BANAT NEWS)