Kasuhan na

CEBU, Philippines -  Pasakaan na og kaso adto sa Ombudsman Visayas kadtong walo ka tawo, apil ang igsoon sa mayor sa dakbayan sa Talisay, nga nalambigit sa pagpamutol og kahoy sa Osmeña Reforestation Project sa Barangay Manipis.

Apil sa pasakaan og kaso mao si Joel De los Reyes, igsoon ni Mayor Johnny V. De los Reyes nga hepe sa Motorpool sa City Hall sa Talisay.

Matud ni Eddie Llamedo, tigpamaba sa Department of Environment and Natural Resources (DENR), ang laing pito nga ilang ikiha sa Ombudsman mao sila si Eduardo Abalo, Antonio Jaberina pulos konsehal sa Barangay Manipis; school head Roger Bajo, truck driver Virgilio Bastida, chainsaw operator Marciano Silva ug Roldan Basamayor.

Gawas sa kaso nga Abuse of Authority nga adto isang-at sa Ombudsman-Visayas, pasakaan pa gayud nila og kaso nga paglapas sa Presidential Decree 705 ang walo ug adto kini ipasaka sa piskaliya.

Gipasabot ni Llamedo nga sanglit ang walo pulos man nagtrabaho sa kagamhanan, ang ipasaka nga kaso kanila mao ang abuse of authority.

Matud ni Llamedo nga ila na nga gipahibalo ang mga opisyal sa kagamhanan sa Talisay kabahin sa hukom sa DENR nga dili na sila mopahigayon og laing husay kay wala sila motubag sa mga pangutana kanila sa mga opisyal sa ahensiya.

“Wala man sila motubag sa mga pangutana, mao nga amo silang gipahibawo nga i-file na lang namo ang kaso karong Huwebes or within this week.” sumala pa ni Llamedo.

Gipaabot na lang sa DENR nga mapirmahan ang affidavit ni Leo Togonon, presidente sa People's Organization sa Barangay Manipis ug ilang tan-awon kun mabutang ba ang ngalan ni Mayor JVR nga posible nga himoon nila nga basihanan nga maapil ang mayor sa kaso.  (BANAT NEWS)