Bata naapil og patay pagpusil sa iyang mama
CEBU, Philippines - Pito diay ka buwan nga buntis ang babaye nga gipusil patay didto sa Sitio Lawis, Barangay Luray II, dakbayan sa Toledo.
Usa ka kabanay sa 44-anyos nga si Dionesia Palao alyas Janet maoy mitug-an nga mabdos diay ang biktima nga gipusil patay sa duha ka wala hiilhi’ng lalaki nga sakay sa motorsiklo niadtong Sabado sa gabii.
Sa imbestigasyon sa kapolisan sa Toledo nga gipangulohan ni Police Inspector Gilfred Baroman nahibaw-an nga naglakaw ang biktima sa ngitngit nga dalan dihang kalit nga nakadungog ang mga residente og usa ka buto sa armas. Ilang gisusi ug napalgan’g nagbuy-od sa dalan ang biktima nga naligo sa kaugalingon’g dugo.
Narekober sa crime scene ang usa ka kabhang sa kalibre .45 nga pistola. Wala pa g’yud masuta sa kapolisan ngano nga gipatay ang babaye nga giingong nakatilaw na og pagkapriso tungod sa kaso sa drugas. (/RUB)(BANAT NEWS)
- Latest
