CEBU, Philippines - Susihon sa Firearms Explosives Security Service Agency and Guards Supervisory Section (FESSAGSS) 7 ang posibleng lapso sa bahin sa gwardiya sa tulis nga nahitabo sa La Nueva sa Inayawan ug sa mismong security agency niini.
Matud pa sa hepe sa FESSAGSS Supt. Marvin Sanchez nga iyang susihon ang taho nga gawas nga duha lang ka bala ang naa sa gwardya unya wala pa gyud gisulod sa tambor sa iyang revolver.
Ang maong gwardya naila nga si Argie Vidal Batiller sa GDS Security and Detective Agency. Nasuta sab ni Sanchez nga ang maong gwardiya wala say initial disposition report sa maong security agency ug wa usab maapil ang La Nueva-Inayawan sa mga establisamento. Apan susihon pa hinuon ni Sanchez kung bag-o ba lang si Batiller nga gwardiya hinungdan nga wala kini maapil sa disposition report.
Ang disposition report mao ang rekord sa mga agency kung asa nila gi-destino ang ilang mga gwardya. Kinahanglan kini nila nga buhaton subay sa lagda. Si Sanchez miingon nga iyang i-request ang GDS nga mosumiter sa tanang mga dokumento ngadto kanila.
Samtang buhatan sab og background check sa FESSAGS ang maong gwardya apan iyang giklaro nga ang ilang imbestigasyon sa aspeto lang nga administratiba tungod kay katungdanan sa gwardya nga bantayan ang mga buhatan diin sila nadestino. (/EIM)(BANAT NEWS)