Drug testing lab gusto palayason ni Rama

CEBU, Philippines - Ang kadagkoan sa St. John Drug Testing Laboratory nga nahimutang sa atubangan sa City Traffic Operations Management (CITOM) building ug gusto na nga papahawaon ni Mayor Michael Rama miinsister nga gitugotan sila base sa kasabotan nga makapadayon paggamit sa mao nga pwesto.

Si Mayor Michael Rama mipadala og suwat kaniadtong Pebrero 28 nga nagpahibalo sa manager sa drug testing laboratory nga wala na’y tinguha pa ang dakbayan sa Sugbo nga mo-renew sa kontrata tali sa mao nga balay-patigayon human mapupos ang lima ka tuig nga kontrata.

Ang kontrata sa dakbayan ngadto sa St. John Drug Testing Laboratory napupos kaniadtong Marso 17 ug matud ni Mayor Rama nga dili na niya ipa-renew ang kontrata nga gisudlan sa dakbayan.

Apan ang manager sa mao nga drug testing laboratory nga si Rosita Mendaros miingon nga ang kontrata naghatag kanila og katungod nga mo-renew sulod sa laing lima ka tuig.

Gani si Mendaros mipahibalo sa mayor nga nakabayad na sila sa abangan ngadto sa dakbayan sa tibuok tuig 2014 sa kantidad nga P96 mil ug gidawat na kini sa City Treasurer’s Office.

Milantugi si Mendaros nga ang pagdawat sa City Treasurer’s Office sa abangan gikan sa St. John Drug Testing Laboratory human mapupos ang termino sa kontrata nagpasabot nga giuyonan niini ang ilang tinguha nga palugwayan nila ang paggamit sa mao nga luna nga iya sa dakbayan.

Ang 40 metro kwadrado nga luna giabangan sa drug testing laboratory og ‘tag otso mil pesos ang matag buwan.

Kini nga isyu gipatun-an na sa City Legal Office aron kagiyahan ang mayor unsa’y tukma niya nga pagahimoon.  (BANAT NEWS)