Tun-an sa Talisay ang Waste Management sa Lapu-Lapu ug Naga

CEBU, Philippines - Usa ka opisyal sa dakbayan sa Talisay mobisita sa siyudad sa Lapu-Lapu ug Naga aron sutaon ang ilang solid waste management aron makakuha sila og ideya unsaon pagsulbad sa problema sa landfill sa Barangay Tapul  nga miulbo na ‘sab kaniadtong Miyerkules sa kaadlawon.

Ang landfill sa Talisay miulbo kini sa milabay’ng buwan tungod sa methane gas gikan sa mga basura nga nadugta ug naapektohan ang panginabuhi sa daghan’g scavenger kay dili na maduol ang landfill aron sila manguykoy sa basura.

Ang mga opisyal sa barangay nabalaka usab nga maapektohan ang panglawas sa mga scavenger ug sa mga nagpuyo duol sa nag-aso nga landfill kay makahanggap sila sa baho sa toxic gas nga hinungaw sa labayanan og mga basura.

Si Konsehal Antonio “Jojo” Bacaltos, Jr., tsirman sa committee on environment mibutyag nga niadtong Miyerkules sa kaadlawon miulbo pagbalik ang Pond C sa landfill sa Barangay Tapul.

Matud ni Bacaltos nga pagkakaron wala usa gipalabayan og basura ang Pond C. Si Bacaltos midugang nga gitun-an karon sa siyudad ang kabahin sa solid waste management aron ang mga toxic gases sa landfill ma-convert ngadto sa energy.

Gibutyag ni Bacaltos nga bisitahan niya ang Lapu-Lapu ug Naga aron maobserbahan ang ilang solid waste management. Gawas niini imbitahon usab sa Talisay ang mga kompaniya nga nagdumala sa solid waste management sa Naga ug Lapu-Lapu aron mopresentar kini atol sa meeting sa Solid Waste Management Board sa Talisay sa ilang sugyot. (Brenda D. Batuto/RUB)

Lalaki naimbargohan og mga drugas ug pusil napriso

Usa ka 19-anyos nga lalaki gidakop sa kapolisan sa Lapu-Lapu kay matud pa mibaligya og shabu ngadto sa usa ka poseur buyer kagahapon sa kaadlawon.

Ang nadakpan sa buy-bust operation mao si Edwin Jay Tampus, taga Sitio Saac, Barangay Pusok.

Si Tampus nadakpan sa mga sakop ni Senior Inspector Junel Caadlawon didto sa iyang panimalay human nga mitunol siya og usa ka paketeng shabu ngadto sa poseur buyer.

Giingon nga na-recover sa mga polis gikan ni Tampus ang laing 30 ka gagmay’ng pakete nga shabu dihang siya girekisa ug nakuhaan pa gayud siya og.38 kalibre nga revolver nga adunay tulo ka bala. Matud pa ni Caadlawon nga ilang sutaon ang nadawat nila nga report nga matud pa si Tampus nalambigit usab sa pagpanulis.

Ang suspetsado gitanggong karon sa Lapu-Lapu City Police Office detention cell ug gikatakda nga pasakaan siya og tukmang kaso karong adlawa.  (BANAT NEWS)